بہ مناسبت روز ثقافت آزرگی: حصہ ھفتوم

چرہ مہ، موجودہ دور رہ، دوری میڈ میکسزم موگوم؟

عنوان یک مقالہ، کی دہ 1973 تھیوڈوسیس ڈابژینسکی، نوشتہ کدہ بود، دہ یک ضرب المثل بائیولوجی تبدیل شودہ۔ عنوان از مقالہ استہ، "دہ بیالوجی، بغیری عینک نظریہ ارتقاء، ھیچ چیز معنی دار مالوم نموشہ۔" چرہ کی، انسان یک موجود اجتماعی استہ، و بیرو از اجتما‏ع، بقاء یک انسان، دہ خطر موفتہ، امزی خاطر،رخ ارتقاء دماغ و فکر انسانہا طرفی مظبوط کدوی تعلق ‌فرد و اجتماع بودہ۔ امزی خاطر، حس و پیوند جزوی نظام اعصاب استہ۔ و حس پیوند و حس جدایی تعلق بسیار نزدیک قد صحت اعصابی، جسمی و امیتر کیفیت زندگی یک فرد درہ۔ موگہ، وقتی کی قبلائی خان، چین رہ فتح مونہ، دہ شھری ممنوعہ، کی شامل قصرھای شاھان چین بودہ، یک شہر از خیمہ ھایی مغولی (گھر، یورت) جور مونہ، تا کی دلتنگی مغولہا، برای مغولستان کم شونہ۔ اگر تعلق یک انسان، از ریگستان صحارا ھم باشہ، و او دہ جنگل امیزان (کی سر سبزترین جای دنیا استہ) بورہ، او برای ریگستان صحارا ضرور دلتنگ موشہ۔ شاید از زمیندارھا شنیدہ باشین، کی سخت ترین حصہ کار ازونا، سودا کدو، و امیتر قصابی مال استہ، کی اونا کلان مونن۔ ای گپ برای ازاونایی کی دہ مراکز صحی کار مونہ، ھم صادق مایہ۔ مطابق اندازے نفسیاتدان ھا (بہ طور مثال، رمانی ڈوروا سولا)، اگر یگو پای خو رہ میدہ مونہ، بعد از پلسترکاری، شش تا ھشت ھفتہ میلگہ، تا استغان پای شی دوبارہ جوش بوخرہ۔ امیتر، اگر یک رشتہ انسانی، از یگو وجہ میدہ موشہ، برای اکثر انسانہا، شش تا ھشت ھفتہ میلگہ، تا استے استے، از زیری اثرات مونٹی شودوی ازو تعلق بور شونہ۔ البتہ، اگر بعد ازدو ماہ، یک فرد ھنوز متاثر استہ، او ضرورت مدد یگو ماھری نفسیات رہ درہ، تا کی، زندگی عادی شی متاثر نہ شونہ۔ 

مقصدی، ازی تمام مثال ھا، ای بود، کی نشان بیدوم، کی حس تعلق دہ یک گروہ انسانی، جزو بائیولوجی انسان استہ، و قانون، اخلاقیات، عقاید، کلچر، زبان، ںظریات، اقتصاد و سیاست، وغیرہ وغیرہ تولیدات زندگی اجتماعی استہ، و اصل مقصد تمام ازینا، پیوند فرد و یک گروہ انسانی رہ مظبوط کدو استہ۔ 

،آمدم بر سر مطلب

چرہ مہ، دور از خود خو رہ، دوری میڈ میکسزم موگوم؟ وجہ شی ای استہ، کی دہ دور از مو، اقتصاد بازار آزاد دہ یک اوتر غول تبدیل شودہ، کی خود خو رہ پابند دہ ھیچ اصول نمینگرہ، و ھر پیوند یا تعلق انسانی رہ یک کالای بازار جور کدہ۔ میخایوم، واضح کنوم، کی ما خود مہ طرفداری اقتصاد بازار آزاد استوم، لیکن، مقصد اقتصاد باید مظبوط کدوی فرد و اجتماع باشہ، و ارزش ھای و حق ھای بنیادی انسانی نمیتنہ تبدیل دہ کالای بازار شونہ (لیکن، مرز آزادی بازار دہ حقوق شخصی افراد ختم موشہ ۔ برای مثال، آدم ھایی کی خاھش درن، کی جزو یک گروہ انسانی مختلف شونہ، و یا تعلقات ھایشی ںزدیکتر شونہ، لباس، زبان، خوراک، قوانین و رسومات ازونا رہ تا یک حد قبول مونن۔ بعض افرادی آزرہ، ٹوپی و پٹوی سندھی و بلوچی موپشہ، و بسیاری از بچہ ھا لباس ھای مغربی موپشہ (بہ شمول از مہ)، و یک کلان حصہ دختروی آزرہ پوشش ایرانی، عربی و ھندی درن۔ تبادلہ فرھنگی، دہ یک معاشرے کثیر الفرھنگی قابل قبول استہ، لیکن، وقتی کی تبلیغات بازاری بعض افراد رہ قایل مونہ، کی بائیولوجی ازونا مطاب‍ق ٹرینڈ دور نیہ، و باید پیکر تراشی کنہ (برای مثال، شیشتنی، کمر، چھاتی، بینی، و جلد خو رہ سرجری کنہ)، ای یک حملہ بلے حق انسانی حساب موشہ۔ ای اینجی اسٹاپ نموشہ، چرہ کی دہ آیندہ بسیار ںزدیک، مو شاید، شاھدی مارکیٹینگ برای ڈیزاینر اولادھا خاھد بودیم (شاید ھم، از چین شروع شونہ)، کی رنگ موی،جلد، چیم، نقش و جسامت بچہ، از پیش تعیین شونہ (تا ھنوز ممکن نیہ، چرہ کی برای جینیٹیک انجینئیرنگ انسانی پابندی استہ، لیکن، دہ صورت پیشرفت زیاد دہ ازی فیلڈ، یک نہ یک روز ای طریقہ کار، قانونی و تجارتی خاھد شود)۔ امیتر، یک مثال دیگہ، حق ملکیت فردی، برای معلومات ذاتی استہ۔ ھر انسان، دہ نتیجہ تعاملات اجتماعی، معلومات تولید مونہ، کی یک حصہ ازو معلومات، شامل معلومات خصوصی موشہ (کی شامل معلومات خانوادگی، تجارتی، تخلی‍قات، تمایلات وعقاید فردی۔۔۔۔ موشہ)، کی یک فرد بہ خاطری حیثیت اجتماعی خو، نمیخایہ، دہ دسترس یک فرد، یا افرادی دیگہ باشہ۔ ای یک حق انسانی ازو فرد استہ، و حصہ ملکیت شخصی شی حساب موشہ، لیکن، دہ دور از مو، دہ بنیادی استعمال انٹرنیٹ، ھم ادارہ ھای تجارتی و ھم حکومت ھا تمام معلومات رہ کی شامل شخصی ترین معلومات موشہ، جمع آوری و تجزیہ مونن۔ و دہ بنیادی ازی معلومات، دہ بسیاری مواقع، یک فرد رہ از خود شی کدہ بہتر میشناسہ۔ مسئلہ، اینجی ھم ختم نموشہ، بلکی، دہ بنیادی تبلیغات، جہان بینی ھای مخصوص ترویج ددہ موشہ، کی بسا اوقات، باوجودی شناخت، کی ای جہان بینی، تعلق فرد و اجتماع رہ کمزور مونہ، و افراد رہ از اجتماع کٹ کدہ، بے دیست و پای مونن (کی برای دفاع از حقوق خو صلاحیت منظم شودوی خو رہ از دیست بیدن)، و یک کلان حصہ معاشرہ، دہ نامی ٹرینڈ روز، خریدار و مبلغ ازی جہان بینی ھا موشہ۔ 

ادامہ دارد۔۔۔۔۔۔

در اصل، مہ، ای مبحث رہ دہ صفحہ فیس بوک شروع کدہ بودوم۔ از خاطری کی صفحہ فیس بوک مہ، ترتیب الفاظ رہ گڈوڈ موکد، مجبور شودوم، ای حصہ شی رہ، دہ بلاگ خو نشر کنوم۔ دہ بابت ازی زحمت، از دوستا معذرت میخایوم۔ دوستا، بقیہ مباحث رہ دہ صفحہ فیس بوک مہ  خاندہ میتنین۔ تشکر۔ 

https://www.facebook.com/khudadad.azara